LOGOTIPO 100% RAZA AUTÓCTONA PORCO CELTA

A Asociación de Criadores da Raza Porcina Celta (ASOPORCEL), foi recoñecida polo Ministerio de Agricultura, Pesca y Alimentación para o emprego do logotipo “100% Raza Autóctona Porco Celta”. A raza Porco Celta foi a primeira raza autóctona porcina española admitida para o emprego deste logotipo que funciona como unha marca de calidade.

O logotipo 100% Raza Autóctona é un selo oficial único, diferenciado e recoñecible, identificador dos produtos procedentes de animais de razas autóctonas españolas, que ofrece aos consumidores as garantías de orixe dos produtos que consumen.

Existe unha normativa nacional polo que se rexe, o Real Decreto 505/2013 de 28 de xuño, polo que se regula o seu uso voluntario nos produtos de orixe animal. O desenvolvemento desta normativa recóllese no prego de condicións para a utilización do logotipo “Raza Autóctona” para os produtos da raza Porco Celta.

Esta é unha iniciativa impulsada pola Asociación de Criadores da Raza Porcina Celta-ASOPORCEL (co aval da Xunta de Galicia e do Ministerio de Agricultura, Pesca y Alimentación), tras unha crecente demanda por parte dos consumidores, de produtos sans, salubres e de calidade.

Esta marca garante a pureza da raza e da cría dos animais mediante sistemas extensivos ou semiextensivos, baseados nunha alimentación natural con aproveitamento dos propios recursos das parcelas.

O logotipo 100% Raza Autóctona Porco Celta só pode ser utilizado polas persoas e/ou entidades autorizadas por ASOPORCEL que, previamente inscritas en algún dos rexistros de operadores autorizados por esta entidade, cumpran con tódolos requisitos legais e se sometan a todos os controis establecidos no prego de condicións que asegura unha vixilancia especial e unha garantía de adecuada calidade.