Os produtos galegos triunfan na capital na segunda edición do cocido de Porco Celta celebrado na Casa de Galicia en Madrid
- A representación de gandeiros de Asoporcel presentes no evento quixo salientar a oportunidade deste tipo de reunións para conectar a produción primaria coa comercialización, a hostalería e o consumidor final.
- A iniciativa forma parte das accións da asociación para a promoción e difusión dos derivados do Porco Celta dentro e fóra da comunidade galega.
A Asociación de Criadores da Raza Porcina Celta (Asoporcel) celebrou este mediodía a segunda edición do seu cocido de Porco Celta na Casa de Galicia en Madrid. O evento, que se suma a outras frutíferas colaboracións da asociación con esta entidade, contou coa presenza de hostaleiros, bloggers gastronómicos, medios especializados, representantes de distintas institucións e de asociacións galegas e da comunidade de Madrid, persoeiros da sociedade madrileña e outros integrantes do sector da alimentación de diversas zonas do país.
“Esta é unha convocatoria especial para nós porque, malia os nosos 25 anos de traballo, a raza Porco Celta continúa en risco de desaparición e, dende logo, a súa recuperación e conservación sería imposible se non contásemos co cento de gandeiros que contribúen, coas súas pequenas granxas, a manter a raza en activo”, subliñou o director técnico de Asoporcel, Iván Rodríguez. “Das súas ganderías saen os animais que dan lugar aos excelentes produtos que imos degustar a continuación”, apuntou, ao tempo que remarcou a intención de que o encontro servise coma homenaxe ao seu labor.
Nesta edición, estivo presente no xantar unha representación de gandeiros de Porco Celta, os cales tamén son operadores autorizados para o uso do logotipo 100% Raza Autóctona Porco Celta e puideron falarlles de primeira man os comensais da calidade dos derivados desta raza, así como do alto nivel do sector produtor en Galicia. “Poucas veces é posible conectar a produción primaria con axentes da comercialización, coa hostalaría ou co consumidor final; esta é unha oportunidade inmellorable para establecer esa conexión”, destacou o gandeiro Fernando Calviño en nome de todos os compañeiros de Asoporcel. “Non imaxinamos unha maneira mellor de dar a coñecer o noso traballo e os nosos produtos que facendo honra á gastronomía tradicional galega na capital”, engadiu Calviño.
Pola súa banda, o director da Casa de Galicia en Madrid, Javier Vázquez Prado, quixo salientar na súa intervención a intención da entidade que representa de seguir sendo un nexo entre Galicia e a capital do país e aproveitou a ocasión para poñer en valor o excelente traballo que vén facendo Asoporcel no último cuarto de século a prol da recuperación do Porco Celta.
UN MENÚ 100% GALEGO
No xantar, o prazo estrela foi, por suposto, o Porco Celta, feito seguindo o estilo tradicional da Festa do Cocido de Porco Celta da comarca de Sarria e composto por cachola, lacón, chourizos, botelo e soá.
Como acompañamento, patacas coa IXP Pataca de Galicia, grelos coa IXP Grelo de Galicia, pan coa IXP Pan de Galicia e viño con DOP Ribeira Sacra. Para a sobremesa, tamén como novidade deste ano, contaron cos doces das Filloeiras de Muimenta, que prepararon estas elaboracións tipicamente galegas en directo para os asistentes.