Existe unha normativa nacional, o Real Decreto 505/2013 de 28 de xuño, pola que se regula o seu uso voluntario nos produtos de orixe animal. O desenvolvemento desta normativa recóllese no prego de condicións para a utilización do logotipo “Raza Autóctona” para os produtos da raza Porco Celta.

Trátase dunha iniciativa impulsada pola Asociación de Criadores da Raza Porcina Celta (Asoporcel), co aval da Xunta de Galicia e do Ministerio de Agricultura, Pesca e Alimentación, tras unha crecente demanda por parte dos consumidores, de produtos sans, salubres e de calidade.

Esta marca garante a pureza da raza e a cría dos animais mediante sistemas extensivos ou semiextensivos, baseados nunha alimentación natural con aproveitamento dos propios recursos das parcelas.

O logotipo 100% Raza Autóctona Porco Celta só pode ser utilizado polas persoas e/ou entidades autorizadas por Asoporcel que, previamente inscritas nalgún dos rexistros de operadores autorizados por esta entidade, cumpran con todos os requisitos legais e se sometan a todos os controis establecidos no prego de condicións que asegura unha vixilancia especial e unha garantía de axeitada de calidade.